ដំណើរទស្សនកិច្ចសិក្សាលើកទី១២២ ប្រចាំសាលារៀន អន្តរទ្វីប អាមេរិកាំង

កាលពីថ្ងៃទី០៧​ ខែកក្កដា កន្លងទៅថ្មីៗនេះ គណៈគ្រប់គ្រងសាលារៀន អន្ដរទ្វីប អាមេរិកាំងបានរៀបចំដំណើរទស្សនកិច្ចសិក្សាលើកទី១២២ សម្រាប់សិស្សានុសិស្សថ្នាក់១២ ទៅកាន់វត្តហរិរក្សរាជិនី ហៅវត្តវាំងចាស់ ស្ថិតក្នុងភូមិវាំងក្នុង ឃុំវាំងចាស់ ស្រុក​ឧដុង្គ ខេត្តកំពង់ស្ពឺ និងបន្តទស្សនកិច្ចសិក្សា​នៅ រមណីយ-​ដ្ឋាន​​​ទេសចរណ៍​ភ្នំ​ព្រះ​រាជ​ទ្រព្យ ស្ថិតក្នុង​ភូមិភ្នំ ឃុំផ្សារដែក ស្រុកពញាឮ ខេត្តកណ្តាល។​ កម្មវិធីទស្សនកិច្ចសិក្សានេះ គឺជាឱកាសដ៏ល្អមួយសម្រាប់សិស្សានុសិស្សសង្កេតអំពី​មហាជន និងបរិស្ថានជុំវិញ​ ហើយនេះ ក៏ជាឱកាសដែលសិស្សានុសិស្សទទួល​បាននូវចំណេះ​ដឹង​​ជា​ច្រើន​បន្ថែមលើ​​​​មេរៀនក្នុងថ្នាក់ដូចជា បានស្វែងយល់ផ្សារភ្ជាប់មេរៀនសិក្សាដោយផ្ទាល់ទៅនឹងភ្នំព្រះរាជ​ទ្រព្យ ដែល​ជាតំបន់​ប្រវត្តិ​សាស្រ្ត ជាអតីត​រាជ​ធានីខ្មែរនាសម័យឧដុង្គ ហើយបច្ចុប្បន្នជាទីតម្កល់នូវ​ចេតិយ​អតីតព្រះមហា​​ក្សត្រខ្មែរ និង ព្រះបរម​សារីរិក​ធាតុ​ព្រះ​សម្មាសម្ពុទ្ធ ដែល​ប្រជា​ជន​កម្ពុជា​ប្រហែលជា​​៩០​ភាគ​រយបានកំពុង​គោរព​ប្រណិប័តន៍ យល់ដឹងអំពីរឿងរ៉ាវ និងព្រឹត្តិការណ៍ប្រវត្តិសាស្ត្រ និងពង្សាវតារប្រទេសកម្ពុជា ផ្សារភ្ជាប់ទៅនឹង ទិដ្ឋភាពជាក់ស្តែង​នៃអតីតរាជធានីខ្មែរសម័យឧដុង្គ គយគន់ទេសភាពភូមិឋាន ស្រែចម្ការច្បារដំណាំនៅអមសងខាងផ្លូវ និងជុំវិញបរិវេណទីតាំងទស្សនកិច្ចសិក្សា ដែលស្ថិតនៅតាមបណ្តោយដងទន្លេសាប និងលាតសន្ធឹងល្វឹងល្វើយលើផ្ទៃដីកសិកម្មក្នុងខេត្តកណ្តាល និងកំពង់ស្ពឺ  និងទស្សនាបរិស្ថានធម្មជាតិ និងស្រូបខ្យល់អាកាសល្អបរិសុទ្ធក្រោមម្លប់ឈើត្រឈឹងត្រឈៃដេរ​ដាស​​ជាមួយនឹងសូរ​​សំឡេងរៃយំកងរំពងលើដែនដីប្រវត្តិសាស្ត្រ​ប្រកបដោយបរិយា​កាស​ស្រស់ថ្លា​ជាទី​មនោ​រម្យ​​​ក្រៃលែង។ លើសពីនេះ សិស្សានុសិស្សមានឱកាសរឹតចំណងមិត្តភាព សាមគ្គីភាព បង្កើនភាពក្លាហាន និងទទួលបានបទពិសោធន៍ក្នុងការបកស្រាយការ ធ្វើបទ​បង្ហាញ ការសហការ ការដឹកនាំ ទំនាក់​ទំនងក្នុងក្រុម ភាពម្ចាស់ការ និងទំនាក់ទំនងជាមួយ មហាជន​ឱ្យបាន​កាន់​តែប្រសើរ និងទទួលបាននូវចំណេះដឹងថ្មីៗបន្ថែម និងអារម្មណ៍ជ្រះថ្លាក្នុងពេលកំពុងទស្សនកិច្ចសិក្សានៅទីនោះ ក៏ដូចជា​ពេល​ត្រឡប់​​​​​​​​មកគេហដ្ឋានវិញផងដែរ។